اربع قصائد لشاعر سلطان الهاجري

عليك الفرج عليك



عليك الفرج ياالله ياحي ياقيّوم *** إلهٍ عباده كلها تلفت يمّه

الا يارفيقي والله انه عداك اللوم *** انا اللي علي اللوم في ذمتي ذمه


ولكن سامحني ترى العلم فيه علوم *** ولا يفرح اللي بيننا ينقل النمه


حصل ماحصل والعبد يصبر على المقسوم *** يدور الزمان ويخلف العزم والهمه


طرات الرجل لا لحقه من الزمان هموم *** ما يدري بسده كود خيرة بني عمه


وسيع البنايد في الشدايد قوي عزوم *** لعظك زمانك شال همّك مع همّه


وانا والله اني ماتهنى بحلو النوم *** ورفيقي عليه هموم الايام ملتمه


اشيل الحمل منه واحطّه علي واقوم *** مقام يورد مظامي الما على الجمّه


لكن الزمان الشين ظالم وانا مظلوم *** على الهون ياللي تمدح الوقت وتذمه


تهب الهبايب والسفن في البحور تعوم *** وتقفي بها صلف الهبايب عن اليمه


هبوب تصلفقها وبحر وسما ونجوم *** وموج تقفاه العواصيف وتذمه


فر قلبي فرت اللي فالهوى مفتره




فر قلبي فرت اللي فالهوى مفتره
مايوردها علياني ولا جفالي
كونكوردٍ صمموها صانعين الذره
واستعدت تطوي الأمتار والأميالي
في قيادة كبتنٍ تصميمها ما غره
ايتفنن في قيادتها بدون أشكالي
فرها فوق المدرج مرتين ومره
لين عرض جنبها صفق الهبوب العالي
وجر قلبي جر قوسٍ في يد اللي جره
يوم جاز اله الحن والراس ما هو خالي
مايشوف من السماء لو كان كبر الذره
نايشه ضيم الزمان وفاقدٍ له غالي
الفراق اكبر مصيبة والجفياء مره
تهدم الظن الكبير وتوجع الرجالي
مثل ما شفت الجفاء فعيونه المحمره
مثل قولت روح في فالك وانا في فالي
لا تذكرني اليا احرقك الزمان بحره
وانس حتى سنترال البيت والجوالي
وانس فزعاتٍ توسع خاطرك وتسره
يوم تنخاني واطوّح غترتي وعقالي
هب يا هذا الزمان الله يكافي شره
بعد كان البرق برقي والخيال خيالي


الرفيـق اللـي لاغبـت



الرفيـق اللـي لاغبـت مايحمـي قفـاي
اجل لامن صرت حاضر ماني في حاجتـه
احتمـي دوري ودور القبيلـه مـن وراي
جمـدوا هـرج الفـراغـات ياهراجـتـه
كانها بمصامـخ الـروس والا بـاي بـاي
خلـو الفلـم المدبلـج علـى دبلاجـتـه
طول عمري ماستمع من ضعيـف الـراي
راي ولاطمعت بديـك خيبـر ولادجاجتـه
العداوه شي عـادي تجينـي مـن عـداي
من نسج نفس العـداوه عرفـت انساجتـه
وان كلاني مخلب من مخاليـب اصدقـاي
قلت ضاعت صيده فـي طـرف عجاجتـه
وان ثناهـا مـرت ثانيـه جعلـه افـداي
لامسـك كلـب الخواجـه كـلا خواجتـه
الارض ماهي ملك ابي والسما ماهي سماي
مير العوج لا اعترض لي عدلت اعواجتـه
افـرده وذوقـه لمستيـن مـن عـصـاي
وادبـه تـاديـب طـفـل علىدراجـتـه
لين ينسى عناد راسـه ويذكـر مستـواي
ينتبـه والا يسوهـج علـى سوهاجـتـه
في نظره الناس لون وهـو هـاي هـاي
والمـدوج مابعـد فـاق مـن دواجـتـه
ابك انا لو اشرب البحر مايقطـع ظمـاي
وانت مثل الضب يزحف تحـت عجاجتـه


يا لحون العود



يا لحون العود.. والا يا مجارير الربابه
إختلف معنى القصيد وضيّع الفنان فنه


حلم.. مدري علم.. مدري نوض برقٍ في سحابه؟
اثرها طلة جبينه يوم زاح الليل منه


أقبلت مثل الفرس لا سمعت طبول الحرابه
مقتفيها ليلٍ أسود والنجوم يفرّقنه


النهار يمر ويعدي وليله في عقابه
النحر صبحٍ تجلى والجدايل كنّهنّه:


مخملٍ يلتف فوق الجيد الالتع بالنيابه
عن سلاسيل الذهب والماس خوف يجرّحنه


غاب عني والوله خلاه عندي في غيابه
ما درى ان فرقاه نار ولا درى ان لاماه جنه


يا وجودي وجد من صفق على ماضي شبابه
بان شيبه والسنين اللي يبيهن خالفنه


غرّته خضر السنين وراح عمره مادرى به
غرّرنه وارفعنّه إلين سجّ وحوّلنّه


ويا وجودي وجد عودٍ لا عيال ولاقرابه
ما جداه الايونّ ويردف الونه بونه


ما لقى فزعة رفيق ولا عادة مستجابه
كل ما امسى له بظنٍ خيّبت الايام ظنه


هذا وجدي في غياب اللي نزح والله جابه
صح فرض الله فرض.. وسنة الرسول سنه


الغلا جسمٍ رقيق ومرهف احساسي ثيابه
مثل غصن الورد يوم الهبايب يطرقنه


ما زرعت الا غلاه ولا نقلت الا صوابه
والحشا ما ضاق من خضر الطعون المستكنّه


يا حبيبي ما زها كف الخضاب الا خضابه
فيه نظم المفردات وفيه للعشاق عنه


الظبي ماله شبيه وبينك وبينه تشابه
التفت بشويش والقى فيه منك وفيك منه


خالقك من فضّل محمد على كل الصحابه
وصخرك مثل المهار اللي تصخّرها الأعنه


والثنا والشكر للي رحمته تسبق عذابه
لا لخلق الله شكر ولا لخلق الله منّه


قاله اللي ما خذا من ما يريد الا هبابه
خيرة الفارس ثنيّه خيل صفراً مستعنه

مشكوررررررر ,,,,,, ياماجد ويجي منك اكثرر